李慧詩話林太都有買飛入場支持
大公網4月16日訊 今日係場地單車世界錦標賽2017最後一日賽事，比賽喺將軍澳嘅香港單車館舉行，香港特別行政區第五任行政長官林鄭月娥（林太）都有去現場，幫香港嘅運動員打氣。「牛下女車神」李慧詩（Sarah）喺最後嘅女子凱林賽雖然大熱倒灶，但喺爭先賽成功奪得銅牌，而且佢嘅表現亦一早贏盡港人掌聲。
林太喺賽後都有特登去慰問Sarah，問佢攰唔攰同有無壓力，又話好開心比賽有咁多觀眾睇，林太自己都有買飛支持，最後希望Sarah繼續努力，佢會留意Sarah之後有咩比賽。而Sarah都話自己有少少攰，因為已經踏入比賽最後一日，但認為自己已經盡咗全力表現香港人精神，感謝大家對佢嘅支持。
其實林太一直都好支持本地體育發展，好似佢參選特首時，香港單車代表隊總教練沈金康亦有拍片支持林太，提到06年多哈亞運會時同林太建議政府應興建一個單車館，而今日比賽嘅香港單車館正正就係當年林太同佢傾完之後宣布興建嘅，欣賞林太決定做一件事，而且認定呢件事有益於社會發展，就會堅定不移咁去做，一定會做成。
