圖：今次「九龍西潮汕文化節」，仲搵嚟前食物及衛生局局長高永文（右二）同深水埗區議員鄭泳舜（左二）擔任推廣大使\大公報記者陳才逸攝
12月最「潮」活動真係多籮籮！繼香港潮州節「潮到中環」之後，香港九龍潮州公會同九龍東、西潮人聯會決定今次「潮到九西」，嚟緊16號喺土瓜灣遊樂場，由早上11點半到晚上9點，大搞「九龍西潮汕文化節」，等唔夠喉嘅大家又多個機會「嘗潮食，賞英歌，睇潮劇」。
英歌唔係大家成日聽嘅英文歌，佢係潮州人嘅集體巡遊表演，主要慶祝神誕節慶，仲係國家級非物質文化遺產之一。據講內容取材自《水滸傳》108條好漢，所以平時表演閒閒哋都要出動到過百人，非常熱鬧。呢類「潮騷」喺香港真係買少見少㗎，今次大會安排咗60位好漢送上「迷你版」英歌畀大家睇，到時記得落足眼力啦！
睇「潮」嘢，又點少得食「潮」嘢呢！到時大家記得喺入口拎定張飛，上面有五張「食物換領券」，咁就可以免費換到潮州滷水、韮菜粉粿、雙丸湯、潮州糖、芋頭卷、水晶包等，真係「一飛在手，潮食入口，個個捧住個肚走」！
