圖：唐三彩載物駱駝昂首嘶鳴，栩栩如生　　 大公報記者謝敏嫻攝

　　今次開箱的四件展品實屬國寶級文物，預展仲未開始，歷史博物館入口處早就「人山人海」，一眾記者擦曬鏡頭等住影相，連張銳森都話沒見過「咁大陣仗」。

　　記者第一次見文物開箱，興奮之餘，捐窿捐罅霸咗個頭位，離文物不到一米。開箱正式開始，三位工作人員戴着手套，推出一個接一個裝着文物的木箱，相機即刻「啪啪啪」響個不停，大家都好擔心錯過任何一刻。工作人員接着攞住電鑽，小心翼翼地鑽開木箱上的螺絲，睇得記者心驚驚。每件展品都有無酸紙、織品或塑膠發泡材等物料重重包裝及保護，剝完一層還有一層，記者和相機、錄像機都「翹首以待」展品「破箱而出」的一刻。

　　每件文物只有三幾分鐘影相，時間一到就再次被包裝放回木箱，大家都忍唔住發出：「咁快！未過癮！hold多陣！」

　　唐三彩載物駱駝從開箱到上台用時近十分鐘，由於瓷器體積較大，經多層包裝，木箱裏還打了木架固定。其間，記者群中不停竊竊私語「仲未見到個頭」。等木箱一側被揭開時，記者可見「駱駝」側面，不由得「嘩嘩」驚嘆。

　　突然間，工作人員停咗下手，大家都有點失望，以為不搬出來。片刻，兩位「壯丁」工作人員開始移動「駱駝」；前一秒相機還在「啪啪啪」，後一秒現場鴉雀無聲，大家好似約定一齊「屏住呼吸」，好怕一點聲響或動作影響「責任重大」的工作人員。當展品順利移置台上，工作人員仍以雙手扶住，以防閃失。

　　「駱駝」終現真身，呈前行進狀，昂首嘶鳴，栩栩如生；近距離看，駱駝背上黃綠釉彷彿還在流動，讓人再移不開眼睛。