大公網11月23日訊 青年新政梁頌恆、游蕙禎被取消資格(DQ)，盟友本民前黃台仰去咗邊?咪去咗台灣勾結「台獨」，之後咪繼續匿埋係網台囉！唔通同你哋「寧為玉碎」咩！佢尋日主持節目，被網友問到點解本民前呢排好似失蹤，黃台仰就話：「我哋唔係唔想搞，我哋而家無……無領袖，無足夠嘅機會可以再畀我哋去發起類似唔同其他嘅行動」佢又話，自己同梁天琦有官司在身，再搞就違反保釋條件，「咁所以現階段我哋未有適合嘅人走出嚟帶領街頭抗爭運動，咁我哋而家其實係培訓緊，希望好快會有新嘅本民前第二梯隊出現。」

　　聽到黃台仰咁講，真係笑咗！無腰骨就無腰骨啦，之前又話組織無領袖，所有行動都係自發，而家就話因為無人做到領袖，所以唔發起行動，係咪好矛盾呢?見到無曬利益啦，Plan B都被人DQ，跟住就藉口有官司係身，退居幕後訓練第二梯隊。喂阿哥，講到尾就係要搵爛頭蟀啦！精人出口，笨人出手。不過大家睇得通透，叫黃台仰係精人就真係太抬舉佢啦！

　　講咗咁耐，連「港獨國師」陳雲都要拋西瓜搵佢嘅西瓜琦去咗邊呢? 咪就係喺加拿大深潛囉！不過十二月初就會返香港出席一啲講座。黃台仰就話：「梁天琦，佢其實會讀書啦，讀書嘅重要性，我諗都唔需要講，而且佢亦都去咗加拿大，佢亦都會去同唔同嘅人會面，跟住會做一啲民間外交。」眼見兩個領袖，一個就龜縮，一個就係外國風流快活，如果有年輕人仍然跟佢哋搞「港獨」，真係不禁要講一句，唔好咁天真啦！