尋日係冬至，所謂「冬大過年」，冬至最重要就係同屋企人一齊過，仲要食湯圓，象徵大家團團圓圓。民建聯主席李慧琼（Starry）尋日就喺社交網站祝大家冬至快樂，佢又話，家庭嘅溫暖係世界上任何一個地方都搵唔到嘅，祝福大家同家人有一個溫暖愉快嘅冬至。
唔知係咪因為咁，尋日下晝Starry同前民主黨主席劉慧卿（卿姐）做節目傾偈時，Starry都邀請卿姐組團一齊返鄉下！
Starry同卿姐本來喺節目度，講開中央已經畀反對派未有回鄉證嘅人申請回鄉證返內地，Starry就問卿姐申請咗未，又話大家都係同鄉，不如約埋其他同鄉嘅立法會議員一齊返鄉下睇嚇。
不過，卿姐就話佢未申請，仲自爆話其實林健鋒都已經問咗佢三、四年，想話一齊返鄉下食飯。卿姐最後都係話遲啲先，如果申請咗會再搵Starry。聽佢哋講，原來除咗佢哋，葉劉淑儀、曾蔭權都係南海嘅同鄉，如果計埋佛山，仲可以搵埋梁君彥嚟。
雖然卿姐同記者講，暫時未有意欲申請回鄉證返內地，不過由建制派最大黨主席同反對派最大黨前主席跟住矛盾返鄉下，真係諗嚇都覺得過癮！
