山頂又有野豬出沒！中西區區議會近日收到山頂區市民反映，經常有野豬喺山頂住宅附近出沒，如加列山道、種植道等，要求當局正視同處理。
政府今次反應都好快。漁護署書面回覆話，野豬喺香港分布廣泛，通常喺山林棲息，中西區同郊野公園相鄰，容易受民居棄置食物吸引而走近，造成滋擾。署方正成立一個工作小組，邀請包括食環署在內嘅相關持份者、本地專家協助，改善垃圾箱、垃圾收集站設計，減少吸引野豬喺戶外翻垃圾覓食。署方仲話，如果要長遠解決野豬出沒嘅情況，市民要合作，停止餵飼，保持環境衛生先得咁話。
不過，短期措施唔少得。食環署話，會喺合適嘅垃圾收集點、垃圾站做改善，例如加裝有鎖掩門或者水馬，防止垃圾桶被野豬翻轉，仲會密切監察，採取適當行動添。
