圖：鄒國基講解習俗，指新娘向父母奉上紅棗茶，寓意感謝養育之恩\政府新聞網fb圖
天生我才必有用，鄭晴見識過社會上好多冷門、專門嘅職業，但鐵漢警員退休後做柔情大妗，都係第一次見。唔少警員55歲退休後展開事業新一頁，60歲嘅鄒國基就選擇咗成為廣東人稱為「大妗」嘅婚禮禮儀師。
退休警本能 識破假賓客
鄒國基接受《政府新聞網》訪問，佢話，五年前退休後唔想無所事事，報讀耆康會專業大妗姐課程，打破傳統成為香港少數嘅男大妗。做過警察嘅鄒國基習慣觀人於微，曾經喺婚宴中識破渾水摸魚嘅假賓客，但亦都有唔少難題，例如男士進入新娘房係大忌，唔方便為新娘整理裙褂，惟有拍住大妗姐互補不足。唔止，鄒國基仲修讀埋司儀和說話技巧課程，白天做大妗，晚上兼埋做婚宴司儀。
鄒國基對習俗涵義瞭如指掌，當新娘向父母奉上熱紅棗茶，佢就解釋話謝恩茶寓意子女長大，感謝父母養育之恩，佢仲話自細好喜歡同尊敬大妗，打點婚禮有條不紊，照顧新人又帶動氣氛，多才多藝，面面俱圓。耆康會主席麥建華話，退休長者再就業係大勢所趨，長者可繼續貢獻社會，僱主亦可解決招聘困難，社會經濟亦得以持續發展。
