民主黨有「癲鴿」之稱嘅許智峯又再發癲!佢尋日喺中西區區議會文化康樂及社會事務委員會開會個陣,大鬧區議會,想睇就睇中西區區議員陳學鋒嘅Facebook啦!
陳學鋒Facebook入面上載咗段許智峯衝擊委員會主席陳捷貴短片,片中許智峯離座企喺陳捷貴後面,好似錄音機咁淨係不斷糾纏重複話:「我希望可以(就我嘅動議)表決投票」。佢見陳捷貴無回應就玩搶咪,多次強搶主席同發緊言嘅另一議員楊開永嘅咪,拉扯之間仲同陳捷貴一齊跌倒地上。難得嘅係,陳捷貴先行站起,仲極有修養咁倒過來扶許智峯起身添。
與會議員怒斥「又再打人」
多位與會區議員都不齒許智峯嘅暴力無禮行為,怒斥佢喺會議上「又再打人」。其後陳捷貴無奈宣布休會,並還原事件真相。佢話,會議討論香港郵政應否關閉皇后大道郵政局,表決結果係支持該郵政局現有服務不應中斷,但許智峯同另一議員吳兆康就提出修訂,要求加入未獲通過嘅議案嘅部分內容。就喺陳捷貴按會議常規,要求其他區議員討論係咪同意有關修訂時,許智峯就要求立即表決,之後就發生咗上述驚人一幕。陳捷貴發現摔倒嗰陣受咗輕傷,事件已報警處理。
但許智峯唔單止無絲毫悔意,仲喺Facebook稱自己「遭主席拉扯、摔倒及箍頸攻擊」,又話人哋阻止表決係「濫權」。嘩,有片有真相,咁嘅大話都講得出?何況陳捷貴年屆68歲,許智峯只係得35歲,同埋一個坐,一個企,邊個暴力仲使問?反對派成日將自己包裝成弱者,明明衝擊咗人哋,都仲可以話自己係受害者,難怪犯法被拉咁天公地道嘅事,都可以講成「政治打壓」啦!