港人「天生購物狂」，隨時不自覺做咗大嘥鬼！有環保團體早前調查發現，近70%港人買嘅衫遠多於實際需求，甚至有一半人買完衫唔着，連Price Tag（價錢牌）都未剪添！鄭晴奉勸各位潮人，分清「需要」和「想要」，唔好衝動購物，要潮得嚟又獨特，左襯右襯仲有效過買新衫。
綠色和平舊年底至今年初委託獨立機構做國際時尚消費調查，分別喺香港、內地、台灣、德國、意大利訪問至少1000位20至45歲不等嘅女士，結果發現香港女士「過度購物」情況冠絕五地，而且有超過40%嘅香港同內地受訪者有買自己負擔唔起嘅衣物。
鄭晴同大家計條數啦。環保署前年數據顯示，香港人一年棄置超過11萬噸紡織物，即係相等於每分鐘丟棄1400件T恤，每日着一件，都夠你着差唔多四年！仲係咁亂嘥錢買嘢？小心荷包乾塘，問你怕未！
