圖：天文台夜晚預測「納沙」會轉彎喺香港400公里範圍外掠過 大公報記者何嘉俊攝

　　七月係風季，繼颱風「洛克」快閃襲港後，鄰近香港海域嘅三個渦旋正相互影響發展，形成「三旋共舞」，當中嘅強烈熱帶風暴「納沙」正移向台灣，按移動途徑，不排除繼續西移，明日進入香港800公里範圍可能打風。天文台尋日下晝預測「納沙」周日至下周一會進入香港400公里範圍，不過到咗夜晚更新預測，「納沙」轉彎喺香港400公里範圍外掠過，真係好彩啦！

　　三股渦旋分別係強烈熱帶風暴「納沙」、熱帶氣旋「奧鹿」，以及正在南海發展嘅一股低壓區（見圖）。鄭晴尋日向天文台科學主任陳恩進請教，佢話集結喺呂宋以東嘅「納沙」，已增強為強烈熱帶風暴，並向西北偏北移動，時速約12公里，移向台灣一帶；與此同時，一股位於南海中部嘅廣闊低壓區正逐步發展，連同距離香港較遠、喺日本偏東位置嘅熱帶氣旋「奧鹿」，三者隨時造成「藤原效應」，互相影響移動路徑及發展強度。

兩風合併威力可大可小

　　鄭晴同大家一樣，最關心香港會唔會打風呢？陳恩進話，按照「納沙」移動途徑，最快聽日先會進入香港800公里範圍。不過陳主任話目前仍然變數太大，不過喺南海嘅低壓區如果生成，喺「藤原效應」之下，就會逆時針互相旋轉，如果兩股渦旋太近，喺1200公里以內，可能會合併，威力可大可小。

　　翻查資料，雙旋共舞甚至三旋共舞並非罕見事，「藤原效應」亦偶有出現，例如2006年8月，颱風「悟空」、「清松」同時喺南海一帶出現。

　　天文台預測今日短暫時間有陽光，有幾陣驟雨，初時局部地區有雷暴，溫度介乎攝氏27至31度，展望未來幾日繼續天氣不穩，大家記得帶定縮骨遮傍身啦。