圖：廖副局首日返工專登打咗條紅色呔，非常搶眼
發展局問責官員「齊腳」，立即拍咗條短片，由新加入嘅副局長廖振新、政治助理馮英倫講入熱廚房感受、工作願景。嘩！入熱廚房噃，兩個人一齊擸起衫袖，一副迎難而上架勢。馮政助話，想煮一道好菜，就要承受到廚房嘅熱。而為咗開個好勢頭，廖副局首日返工，專登打咗條紅色呔，非常搶眼，佢話希望工作事事順利，雖然第一日未感覺到熱廚房溫度，但對新崗位新挑戰，一定積極做好。
唔講唔知，原來佢兩個都鍾意去郊野公園行山。廖振新話，會參加太太同朋友嘅「太太行山團」，認真恩愛。馮英倫就鍾意香港可以一邊行山一邊睇海嘅特色。對於郊野公園呢個具爭議議題，廖振新話會多留意市民意見。
雖然第一次拍片，但成條片有曬劇情鋪排，鄭晴睇得出，有花心思「度橋」，更加緊貼潮流，喺最後加入「彩蛋」，由局長黃偉綸扮「亂入」做大配角，叫大家夜晚八點幾要放工返屋企，盡顯局長幽默一面。
