圖：劉小麗早前居然話會參與今次九龍西補選，當然被人鬧爆
早前六人喪失議員資格，當中四個立法會議席將會喺明年3月11號舉行補選，其中九龍西嘅議席補選，就比較多人關注。而家就宣誓案上訴緊嘅劉小麗，早前居然話會參與今次九龍西補選，當然被人鬧爆啦！不過，已經終極敗訴嘅青年新政游蕙禎就話呢個位係佢嘅，要選都係青政或者相同理念嘅人出選先。
劉小麗尋日接受傳媒訪問時就「認低威」改口風，話之前講參加補選，係基於青政無人參與，而家考慮到大局同埋政治倫理，如果青政有人出選，佢就傾向唔出選喎。不過呢，劉小麗補充，青政如果真係派人選，就應該盡快交代，唔好咁曖昧喎！另外呢，民協馮檢基、民主黨袁海文都有意落場，咁負責協調反對派嘅民主動力就話，反對派而家對青政優先落場未有共識喎！
其實利字當頭，反對派幾時有過共識啊？港島和新界東補選，咪一樣爭崩頭、狗咬狗骨。佢哋成日話要修補撕裂，真係要修補嘅恐怕係反對派內部嘅千瘡百孔囉！
鄭晴
