上任後一直努力改善行政立法關係嘅特首林鄭月娥，下周一將首次宴請立法會議員，佢尋日出席電台節目時，透露有四十多位議員答應出席，其中有九個係「泛民」。佢又形容自己對立法會嘅態度係「客隨主便」，「叫我們來幾次就來幾次、叫我來多少分鐘就多少分鐘、叫我說話好、不說話也好。」佢認為釋出善意換來嘅結果都唔差。林鄭又話，自己處事係對事不對人，不會凡事都考慮建制或「泛民」嘅聲音，但如果觸及「港獨」、「一國兩制」等立場問題，必會依法辦事。
林鄭又大爆自己工時長，話「可能好叻嘅人可以好快一日幾個鐘就做完，或者我唔係幾叻，每天做十六、七小時，去履行責任。」被問到丈夫林兆波是一直很支持她，還是會埋怨做十七小時時，林鄭話：「當然有，他話我『黐線』，佢有幾晚話我黐線㗎，話『兩點幾喇喂老婆』。」當主持問佢五年後會唔會競逐連任時，林鄭就笑住咁話：「你問林先生。」
