大公網10月6日訊 游蕙禎BB日前嘅「撲嘢論」簡直一石激起千重浪，不過佢侮辱人都好叻架。今日游BB就喺facebook寫咗一篇叫《吾與老賊誓不兩立》嘅文章，話中英談判嗰陣，英方同意將香港主權移交中國，當時港人沒有太大反彈，而立法會功能組別就遺留落嚟，千秋萬世。佢又話，梁君彥同陳健波係零票當選，「本應保持低調以免進一步觸怒港人」，但而家分別競逐大會主席同財會主席，荒謬絕倫。游BB更加話「『吾與老賊誓不兩立』，本人將不會與無任何民意認受的偽立法會議員作任何溝通」，又話「本人勢必以更強硬的抗爭，阻止其沐猴而冠。」

　　睇完呢篇文章，真係不禁搖頭嘆息。游BB不如返大學繼續進修一下啦！啲邏輯呀、資料呀完全令人發笑，如果當日港人無太大反彈，當時就唔會有移民潮啦！仲有，游BB知唔知乜叫尊重呢?梁君彥同陳健波都係喺合法渠道下當選，何錯之有? 如果游BB係合資格嘅，佢都可以去挑戰架。而家咁樣批評人家，咪顯得自己好唔得體，無禮貌同無常識囉！另外呢，鄭晴只係識咩叫偽鈔，唔知咩叫「偽議員」。議員就係議員，有分真假嘅咩?唔通我無份選游BB出嚟，佢就係「偽議員」咩?

　　另外，更強硬的抗爭又會喺咩呢?口頭勇武嗎?還是真係勇武行動呢? 鄭晴真係唔知啦！只係知游議員日前憑「撲嘢論」，衝出國際，成功得到《時代》雜誌(TIME)網站嘅報道，真係無得頂呀。