八個「芬毛毛」令梁美芬「煥然一新」。設計圖片
成功連任九龍西立法會議員嘅梁美芬（Priscilla），係今屆立法會選舉形象大翻身，唔止脫下標誌性嘅「珍珠耳環」，仲換上一套亮麗嘅Polo恤示人，連香港著名時裝設計師鄧達智早排都盛讚佢「煥然一新」！點解咁大改變？原來係多得美芬嘅八個「芬毛毛」！
阿仔叫阿媽投Priscilla
美芬話，呢八個「芬毛毛」都係年輕人，有好多緊貼潮流嘅新想法，自己可能跟得佢哋多，覺得要試下改變形象，以前死都唔肯除低珍珠耳環同頸鏈，仲愈買愈多；而家反而肯以運動Look示人，仲拍埋惡搞片等，形象親民咗好多，仲話而家啲芬毛毛成日搵佢嚟玩添！
美芬又提到自己從政多年，累積咗批大學生、年輕家庭等較young嘅支持者，並唔係網民想像中得啲中年粉絲咁話。佢同鄭晴講，有次去大角咀街市，有個老闆娘出嚟搵佢影相，美芬話：「個老闆娘話其實唔識我，不過佢18歲個仔喺澳洲打長途返嚟，叫阿媽一定要投梁美芬！平時中年婦女Fans好多，但調轉頭個仔叫阿媽投都真係第一次。」
