圖：秋北換上一套廚師「戰衣」，變成整餅師傅，睇個樣都似模似樣 設計圖片
中秋佳節臨近，食月餅自然少不了，但工聯會理事長吳秋北不單止要食，仲要親手學埋整添！點解？原來工聯會飲食業職工總會自03年「沙士」以來，每年都整「愛心月餅」，關心下一班「哥哥姐姐」同會友，向佢哋致意，令佢哋感受下「人月兩團圓」，加入義工行列嘅秋北，一於實行「秋北學整餅」。
平日斯斯文文嘅秋北，整餅究竟得唔得？鄭晴喺工聯會嘅社交網站上，見到秋北突然換上一套廚師「戰衣」，搖身一變，變成整餅師傅，睇個樣都似模似樣。秋北又向飲食業職工總會嘅師傅偷師學藝，整皮、包餡、印模、拍餅，成個流程，對佢來講完全無難度。唔講唔知道，原來月餅放入爐前，要喺表面噴少少水，秋北話咁樣係要防止個餅爆裂，同埋個樣都會靚啲。鄭晴又聽講，飲食業職工總會端午節有「愛心糉」，年尾又有「愛心年糕」，唔知秋北有無興趣學埋佢呢？
