圖：國泰「空中女王」747型號客機正式退休/大公報記者馮翰林攝

　　喺國泰服務37年、有「空中女王」之稱嘅747型號客機，喺9月30號同10月1日號完成來往香港同東京之後，就已經退役。國泰喺飛機起飛前，分別喺香港同東京都有舉行歡送儀式，乘客可以搵空姐合照，又可以暢飲香檳同果汁，氣氛好熱鬧。鄭晴都體驗咗一日之內往返香港同東京嘅空姐生活。我哋臨上機之前，仲有紀念品收，包括一張由機組人員簽名嘅飛行證書，以及特別為747退役而製嘅珍藏品。

　　既然係最後一班客機，又陪咗香港人咁多年，當然吸引到好多乘客或者飛機迷前嚟送別啦！郭生特登由溫哥華飛返嚟香港坐呢班747，之後就要匆匆飛返溫哥華。佢話，六歲嗰陣第一次搭飛機都係國泰747，而國泰嘅747係好唔同，因為係首間公司引入私人電視，所以都唔捨得747退役。來自馬來西亞嘅李先生就話，今次專登飛嚟香港，就係要搭呢班747型號，因為自己對747好有感情，第一次搭飛機就係搭747，當年仲係啟德年代！

　　鄭晴當日絕對感受到乘客嘅熱情。當扣好安全帶嘅提示燈熄咗，大批乘客離開座位，喺機艙唔同位置影相留念，電視、艙門甚至洗手間都唔放過，當然最受歡迎就一定係四位着住唔同年代制服嘅空姐，佢哋企喺機上著名嘅樓梯畀飛機迷、傳媒影相。結果兩條通道全部都塞滿曬人！不過機迷相當貼心，除咗同空姐合照之外，仲送埋自製小禮物畀佢哋添。機長一度幽默咁話，空姐始終要派餐，希望大家先返座位，如果唔係就撳「扣好安全帶」掣。

　　首架降落赤鱲角機場嘅飛機

　　10月1號下午二時左右，747終於由東京返港。機長John Graham落機之後就話，今次係最後一次同乘客一齊飛747，又多謝747保護佢平平安安，飛越颱風、塵暴、戰火區域等，係一架相當硬淨嘅飛機。自己仲喺747上面識到老婆添。機艙客務經理Chaivaree Chitrakorn話，自己80年代加入國泰，見證747由200發展到400型號。除咗係747退役，自己都就嚟退休。佢一度哽咽，感謝機迷送上明信片、朱古力等小禮物。唔少空姐空少仲專登用trump card申請要喺呢班機服務呢！

　　呢班機「B-HUJ」係最有名嘅國泰747，因為係首架在赤鱲角香港國際機場降落嘅飛機，亦係首架飛越北極上空、創下7465海里直航飛行紀錄嘅飛機。而家最終退役，鄭晴不禁想起Eason首歌，「當世事再沒完美 可遠在歲月如歌中找你」。

　　鄭晴