圖：「青政」、「本民前」公然講佢哋會利用公帑「裏應外合」推動「港獨」/設計圖片

　　借「青年新政」成功謀取立法會議席嘅「本土民主前線」，竟然公開披露佢哋利用議會資源「裏應外合」推動「港獨」嘅狼子野心。「本民前」黃台仰尋晚喺佢個人facebook直播就講到明，將會利用立法會所得嘅資源開設地區辦事處，又話會成立「基金會」推廣宣傳香港歷史及文化。事實是，黃台仰及梁天琦今日將出發到台灣勾結「台獨」勢力，而作為佢哋「代議士」嘅梁頌恆亦都話，將喺議會入面繼續「跟進港獨議題」。鄭晴聽到呢班人咁講，真係心都寒埋，立會甚至香港未來呢四年一定好多麻煩嘢。

　　梁天琦尋日喺電視台專訪公然承認佢唔會做梁頌恆或游蕙禎嘅議員助理，全職及兼職都唔會，只會做「義務顧問」，但黃台仰夜晚喺facebook直播就食咗「誠實豆沙包」，表明佢將會利用立法會取得嘅資源，開設更多地辦，加大影響力，又透露將會成立「基金會」，進行文化出版活動，到各地推廣「香港文化歷史」。

　　面對空談「革命」嘅質疑，佢就狡辯「時代革命一路都做緊」，「革命不一定是武裝革命，從思想改變也是革命一種」雲雲，自吹自擂指佢哋啟發咗好多年輕人關心香港前途，令「激進」嘅定義於一年間由反水客「搞喊細路女」變成擲磚，天真稱「只要不斷進逼，令政權退無可退，政權就會崩潰」。黃台仰更狂言「香港獨立是為了世界和平」。

　　喺旺角暴亂被控暴動罪嘅黃台仰與梁天琦，上月案件交高院申請保釋時透露，今日至26日離港，計劃應「台獨」組織「基進側翼」邀請，去台灣出席多場論壇同講座，向台灣大學生講述香港情況。