圖：港區全國人大代表四川視察團參觀西昌衛星發射中心
國家嘅航天科技發展真係日新月異，神舟十一號載人飛船下星期一就會喺酒泉發射升空喇。大家都知道，國家有四個衛星發射基地，除咗酒泉之外，仲有西昌、太原同文昌。而家喺四川視察緊嘅港區全國人大代表團，尋日就參觀咗西昌衛星發射中心，一睹發射架和火箭實體嘅真容。呢個地處四川大涼山峽谷嘅衛星發射中心緯度低、海拔高、雲霧少，好適合航天發射。佢嘅歷史亦一啲都唔簡單，1986年國家第一粒通信廣播衛星「東方紅二號」就係喺度成功發射，之後又肩負探月工程嫦娥一、二、三號，同埋北斗導航衛星嘅發射任務，唔少國外嘅商業衛星都喺度發射過。有人大代表同鄭晴分享，國家嘅航天科技一日千里，真係好值得香港嘅學生深入了解，培養佢哋對科技嘅興趣同埋創新嘅思維，有朝一日可以為香港同國家嘅發展作出貢獻。
