圖：麥美娟同海關搜索犬興奮合照/大公報記者張月琪攝
工聯會立法會議員麥美娟（Alice）向來都係愛狗之人，尋日佢喺政府人員嘉年華度一見到海關三隻搜索犬，即刻難掩興奮心情，大影合照之餘，仲請教埋訓練狗狗嘅技術。不過Alice同鄭晴講，海關訓練嚴格，自己就係「怪獸家長」，都係繼續縱兩隻狗狗算啦。
查實Alice細細個就同狗仔結下不解之緣，佢話細個住喺外婆度，外婆成日都會收養狼狗，到佢長大後，雖然有一段時間因為居住問題無養狗，但近年搬咗屋，就情不自禁養番兩隻貴婦狗。
見到幾隻搜索犬咁乖仔，靜靜坐喺度同市民影相，Alice話佢都有請教過關員，「佢哋平時訓練唔用零食，淨係獎毛巾畀佢哋玩，但我會用零食引佢哋㗎，我會縱佢哋㗎，我係『怪獸家長』嚟。」Alice仲話，近期最頭痛就係兩隻乖女唔多鍾意食紅蘿蔔，即使佢好有心機切碎嚟撈其他食物，囡囡都唔畀面，照吐番啲嘢出嚟，搞到佢無曬符啊！
