圖：長毛尋日喺建制派開記招嗰時，突然走出嚟掟午餐肉 /大公報記者蔡文豪攝
尋日立法會出現咗隻長毛「大嘥鬼」，亂咁喺議會掟嘢食，佢就掟得爽啦，喺膠袋拎出嚟一塊接一塊咁掟，難為基層市民平時買罐頭都肉赤呀陰公，咁樣嘥食物法，鄭晴真係無眼睇喇。
話說社民連梁國雄議員尋日喺建制派開記招嗰時，突然走出嚟掟午餐肉，結果啲午餐肉就跌曬喺地下同埋「咪兜」，浪費食物之餘，仲難為清潔工人要執手尾。
根據午餐肉圓形形狀，鄭晴就估計係某橙色罐裝嘅午餐肉，呢款一罐397克喺超級市場就賣緊15.9元，仲要講緊有優惠先16蚊都唔使咋！而家最低工資先得32.5元，即係基層員工要做足半粒鐘，先可以買到一罐午餐肉。
想抄工聯會王國興用午餐肉做比喻，都唔好搵食物嚟玩啦，興哥就用數據嚟擊倒反對派，但長毛就「冇衣食」，做咁多大龍鳳，有時間不如諗多啲計幫下基層市民啦。
鄭晴
