你有冇試過喺工展會一次過買12支豉油？鄭晴就試過，真係試過，但拎12支豉油真係重到無朋友！網購可以買買買，唔使驚拎餐死，愈來愈受歡迎，廠商會亦準備強攻網購熱潮，密鑼緊鼓推出「網上工展會」平台，畀大家掃平貨！
講起網購，鄭晴諗起，全球最大型嘅網購節日、淘寶每年11月11日嘅「光棍節」真係愈做愈大，單日交易額每年幾乎以倍數增長，舊年去到912億元人民幣。順住網購熱潮，廠商會嘅網上工展會，尋日就已經登陸咗香港雅虎Store，即日起至10月27日，會先推出「限時搶購」優惠，有為期一個月嘅「本月優惠」活動，產品將會低於半價或七折發售，睇嚟鄭晴又要「大出血」啦！
家下「網上工展會」已經有超過50家商戶同過千件產品加盟「網上工展會」，廠商會副會長兼展覽服務有限公司主席戴澤良都同鄭晴講，平台運作會參考下淘寶，定期推出購物優惠，每個禮拜、每個月都有唔同筍貨。
「網上工展會」初步主攻港澳台三地市場，咁會唔會考慮加入淘寶呢個超級平台，將「香港製造」產品帶入內地市場？戴澤良就話要睇市場反應，最快都要睇半年至一年先有定論。佢又話，「網上工展會」初期細細哋搞住先，試下水溫，將來可能有愈來愈多商戶參與。
