作為打工仔，最希望遇到一個好老闆，公司福利好、人工高！民政事務局和家庭議會尋日舉辦「2015/16年度家庭友善僱主獎勵計劃」頒獎典禮，有得獎僱主教路話，憑奉行「No OT」（不加班）政策，提供多種福利，令公司上下士氣高漲，鄭晴認為值得僱主借鏡。
尋日頒獎禮上，有2555間唔同界別嘅大中小企和機構獲獎。其中，日本命力健康食品有限公司嘅福利，聽到鄭晴我流曬口水！該公司執行董事連舜香話，公司廿年嚟一直採取「No OT」政策，旺季時仲請多幾個兼職分擔工作，公司仲提供埋子女託管服務，等班手足可以專心搏殺咁話。
假期就除咗生日假外、為人父母嘅員工仲可以有兩日親子假。又提供每月300元膳食津貼、同埋每年1000元嘅父母旅遊津貼，去澳門玩嘅話，仲可以申請免費入住澳門過千呎宿舍添！
正如政務司司長林鄭致辭時所講，「公司如凡事『以人為本』，體貼員工需要。員工能照顧好家庭，無後顧之憂，工作自然更加落力起勁，公司生產力得以提高。」年尾在即，各位老闆又係時候，好好慰勞辛苦咗成年嘅員工，業績理想嘅，不妨加嚇人工，請嚇食飯啦！
