直銷電話近年愈嚟愈普遍，鄭晴閒閒地一日都接十個八個，都有啲擔心自己嘅電話號碼被濫用，估唔到就連私隱專員黃繼兒（Stephen）都係受害者。尋日Stephen右手戴住個大手掛開年結記者會，被問到點解直銷嘅投訴數字上升得咁厲害，佢就自爆前排行街時落緊樓梯見電話響，一聽到係直銷就即刻收線，但接電話令佢分咗心，失足仆咗落樓梯，搞到撞親膊頭斷咗一條筋，醫生吩咐佢起碼要休養六個月。Stephen慨嘆直銷形式不斷改變，最近好多係趁食午飯及晚飯時候打嚟，佢仲奉勸大家行路千祈唔好聽電話。鄭晴都祝願專員早日康復，繼續為市民嘅私隱把關。
