圖：陳恒鑌（右四）聯同團隊成員一齊向市民送上祝福
仲有幾日就到雞年，民建聯立法會議員陳恒鑌（Ben）最近就搵埋佢嘅地區服務團隊成員拍攝賀年短片。眾人一齊搓湯圓，祝市民團團圓圓、身體健康、雞年行大運。
短片所見，團隊成員合力負責整湯圓，之後一齊品嘗製成品，個個都好開心。
有份搓湯圓皮嘅葵青區議員李世隆就話，只要付出汗水同心機，麵糰就可以愈搓愈圓，做地區工作亦都係同樣道理，努力過後最終會見到成果。
喺短片嘅尾聲，阿Ben仲「惡搞」咗染髮產品廣告同埋迷你倉廣告，送上新年祝福之餘，亦都幫荃灣區議員古揚邦宣傳佢嘅辦事處電話，認真盞鬼。其中，阿Ben嗰句「逐漸發財又得，立即發財都得，得咗！」仲引嚟網民讚好添。
至於阿Ben嘅黨友、同樣作為新界西立法會議員嘅梁志祥（祥哥），早前亦都親自為自己嘅議員辦公室寫揮春，希望辦事處嘅職員個個都「出入平安」、「如意吉祥」、「金雞報喜」。
