圖：陸頌雄同童軍喺大潭水塘自拍
去旅行唔一定要用好多時間嘅，好似工聯會立法會議員陸頌雄咁，一個復活節假去三個地方都無難度……因為三度都係香港一日遊！陸頌雄首先帶住童軍去行山，同十幾個小朋友一齊行港島嘅大潭水塘。你見陸頌雄一手拎住單反相機，一手拎另一部機同大家自拍，就知佢話開心指數爆燈有幾堅。
之後嗰日，陸頌雄去咗馬鞍山山腰嘅馬鞍山村。上世紀50、60年代香港鐵礦業興盛，唔少喺馬鞍山鐵礦場工作嘅工人同家屬遷入馬鞍山村定居，當年亦有教會特登深入山區，為村民提供服務。陸頌雄就去咗50年代建成嘅信義會恩光堂睇過，佢話旅程係本地特色綠色旅遊，可發掘自己未認識的香港史。
尋日陸頌雄仲去埋元朗廈村，出席由廈村鄉事委員會主辦嘅「創意塗鴉2017」。大會安排傳統建築前擺放住一個個嘅貨櫃，上面有以鄉事傳統文化同環保為主題嘅唔同塗鴉畫作，相當有意思！
