圖：施俊輝個B女Shereen有個巨型嘅花園造型生日蛋糕
早幾日除咗係復活節假期，原來仲係教育局政治助理施俊輝（Jeff）囡囡Shereen一歲生日嘅大日子。Jeff為Shereen搞咗一個相當熱鬧嘅生日party，仲搵咗唔少同佢哋一樣初為人父母嘅朋友同小朋友一齊慶祝，工聯會立法會議員何啟明、自由黨區議員李梓敬、新民黨區議員陳家珮同佢哋嘅BB都係座上客。
Party主角嘅壽星女Shereen着住淡粉紅色嘅公主裙仔，頭上有一條小辮仔，眼仔碌碌，相當可愛。
生日party之後，施俊輝同何啟明分別喺網上分享party嘅盛況，何啟明仲話以後要多啲同大家一齊出嚟「遛娃」，又話要搵埋李梓敬同陳家珮一齊出嚟。鄭晴諗起咁多得意BB聚埋一齊都覺得好期待，唔知下次輪到邊個BB生日呢？
