圖：中聯辦主任張曉明晨早去行書展，買了三本書

　　暑假去邊最接地氣？梗係行書展啦！尋日香港書展繼續湧現人潮，仲有好多港人熟悉的身影添。中聯辦主任張曉明晨早就專程去行，中華書局、商務印書館、三聯書店，仲有明報出版社、大眾書局、四川出版集團同江蘇鳳凰出版集團等多個攤位前，都見到張主任嘅身影，佢同市民一齊揀書、買書，感受下濃濃嘅書卷氣氛。

　　旺場反映市民高素質

　　尋日繼續有好多家長帶着小朋友，拉住一個二個旅行篋，去書展掃貨，大手筆揀買鍾意嘅書，全場瀰漫書卷味。張曉明主任見到都好高興咁話，「早就聽說香港書展人氣旺、氣氛濃，今日一見名不虛傳！」佢仲話，喜愛閱讀係一個社會文明程度嘅重要指標之一，呢個場面充分反映咗香港市民素質高，係香港呢個城市有品位嘅一個例證。

　　張主任行咗差不多一個鐘後，就喺中華書局攤位，買咗三本新出版嘅書，呢三本係：《周恩來答問錄》、《習仲勳畫傳》同埋《香港如何「帶」「路」》，總消費約為三百幾蚊到啦！鄭晴就八卦過，呢三本書都非常值得讀，好似《周恩來答問錄》咁，就收錄咗周恩來喺1936年至1971年間，接受中外記者採訪嘅談話、答問同聲明等文稿共64篇，由側面反映出周恩來喺推動中國革命同社會主義建設所作出嘅歷史貢獻。

　　講到《習仲勳畫傳》，該書收錄咗國家主席習近平父親習仲勳嘅金句之外，更收錄咗近300幅珍貴圖片，包括幾十張唔同時期嘅家庭合影，有啲仲係第一次公開發表，非常值得收藏。至於《香港如何「帶」「路」》一書，唔止介紹咗「一帶一路」時代背景同重要意義，仲針對「一帶一路」嘅需求作出分析，睇下香港可以把握咩機遇，全國政協副主席、前特首梁振英仲有份幫本書寫序言添！