圖：邱騰華話自己每年都會抽時間去書展」大公報記者蔡文豪攝

　　商務及經濟發展局局長邱騰華尋日亦應邀出席書展分享會同年輕人對話，仲話自己每年都會抽時間去書展，就算收工之後夜晚10點、11點左右都會抽時間去。不過平時工作太忙想睇書都唔容易，所以好多時趁住搭飛機嘅時候睇，又或者會係星期日朝早起身之後睇，仲好有心得咁話朝早睇有一個好處，就係無咁易「瞌眼瞓」喇。

　　邱騰華仲有個好得意嘅習慣，佢通常剪完頭髮都會去行書店，而且透露自己每兩、三星期就要剪一次頭髮，所以每兩、三個星期就會行一次髮廊附近嘅書局。邱騰華話自己一向鍾意行書局，特別係佢讀書時候嘅樓上書店，有種「好文青、大隱隱於市」嘅感覺。

　　邱騰華之後又向年輕人推介咗兩本書，分別係由一位患末期肺癌嘅醫生，喺離世前寫，分享自己人生觀嘅自傳《When Breath Becomes Air》，同埋由作家Malcolm Gladwell撰寫的《David and Goliath：Underdogs, Misfits, and the Art of Battling Giants》，話呢本書以大衛同巨人哥利亞之戰，分析說明人人能力唔同，世間上並無所謂必勝策略，反而做好準備、有勇氣去挑戰同埋唔怕壓力先係致勝關鍵。

　　話時話，身為商經局長，邱騰華今日買邊類書大家想唔想知，又估唔估到？BINGO，經濟及旅遊類，咪就係有關「一帶一路」同背包客旅遊嘅書。