圖：聶德權話出任問責官員20多天，工作和生活都更忙碌\大公報記者蔡文豪攝
政制及內地事務局局長聶德權尋日亦同一班年輕人行書展，仲買咗兩本青協推薦有關《一帶一路》同一本叫《不要放棄字療》嘅書，盛惠120元。
堅持完成工作 滿足感大
聶局長話，書展係佢每年必到嘅地方，睇下新出咗咩書。佢尋日仲即場推介咗兩本書畀年輕朋友，包括吳俊霆嘅登峰故事同另一本關於跑步嘅書，又話以前出任食衛局常任秘書長時，除咗做嘢亦經常注意健康，跑步更加係佢其中一項最愛嘅運動，「而家都keep住每個禮拜跑步，因為跑步有雙跑鞋就得，亦都無時間限制，而每次跑完我都會超級開心。」
聶德權又話，自己出任問責官員20多天，工作和生活都更忙碌，因為負責嘅範疇新，有好多嘢需要學習，開始時特別辛苦，但心境仍然保持良好，仲話做事同做運動一樣，中間總有想放棄嘅時候，但堅持完成嘅話會有非常大滿足感。
聶德權亦當場分享閱讀心得，話閱讀可以令佢忘記工作，進入另外一個空間馳騁。佢仲話自己好鍾意睇推理小說，因為以前讀理科，個人比較理性，更加偏愛邏輯類的書；但後尾驚睇得多個人會變得太冷酷，要睇返人性化少少嘅嘢，接觸不同人。
