先行新界北港島南

　　圖：新車同一般豐田16座小巴無乜分別，最大分別應該係車身嘅字改成「公共小型巴士十九座位」/受訪者提供

　　公共小巴嘅座位上限已經增至19座，話咁快，截至尋日已經有三架19座小巴通過運輸署檢驗程序，最快下星期「落地」出來載客啦。鄭晴四出收風，知道來往屯門至上水嘅44系列小巴線，以及港島南區嘅進智公交，都分別引進咗19座新車，睇嚟新界北同港島南市民最有機會成為首批座上客。

　　運輸署話，因應業界訴求，已安排驗車線專責處理19座公共小巴檢驗工作，務求縮短驗車輪候時間。現時，只需一天預約驗車時間，一般而言，申請人如提供足夠資料，一般可在兩星期內完成車輛類型評定審批，然後做車輛檢驗。署方話，公共小巴營辦商可因應實際營運情況，考慮係咪更換為較多座位小巴，或利用旗下現有「長陣」小巴申請加位，兩者申請手續及檢驗程序相同。所有小巴座位布局方案，須通過運輸署評定審批，做車輛檢驗。通過檢驗，車輛須向運輸署登記，攞到客運營業證明書，先至可以提供服務。

　　車價73萬 分銷商收300訂單

　　代理豐田小巴嘅皇冠車行大眾運輸部總經理李啟祥話畀鄭晴知，佢哋已經收到分銷商300架訂單，車價介乎68萬至73萬元，如果將舊款拆去行李架改成19座，每架改裝費大約1.5萬元。表面上，新車同一般豐田16座無乜分別，但其實配備LED顯示屏，上落樓梯多一級，兼有落車鐘，座椅頭枕邊裝有扶手。民建聯立法會議員劉國勳一向反應快，今次都唔例外，佢安排咗一架19座位小巴，今日畀傳媒試坐。實情係點？鄭晴今日直擊試坐後，再話畀各位讀者知喇。

　　鄭晴