圖：林鄭月娥出席《一岱偉大鍾鋒 締造光輝歲月》足球展覽/ 大公報記者蔡文豪攝
「遠東足球王國」─大家會諗起邊個地方呢？日本？韓國？鄭晴開估，其實係香港。香港曾經有過呢個美譽，不過年輕嘅球迷就未必知道啦！尋日林大輝慈善基金舉行圖片展，介紹三位足球名宿，包括張子岱、黃文偉同鍾楚維。張子岱當年加盟英國甲組黑池足球隊，仲要有入波，至今都係唯一一位喺英國頂級聯賽入波嘅香港球員。黃文偉喺1960年，年僅16歲就出席羅馬世運會，綽號神童偉，而鍾楚維就係「亞洲第一中鋒」。
呢個圖片展將會巡迴全港各個地方，時間長達九個月，大家都可以欣賞一下。尋日特首林鄭月娥都有出席開幕禮。早排港隊比賽時接連出現有觀眾「噓國歌」嘅事件，林鄭雖無講明，但佢就話，體育唔應該講政治，希望各位都唔好將政治帶入體育。唔同黨派嘅立法會議員都有出席，有建制派又有反對派，林太講笑咁話，好少見到一個活動有咁多唔同黨派嘅立法會議員，真係要向林大輝請教呢！大輝就話，大家撐港隊，就唔應該噓國歌，而足球係軟實力，期望可以做到團結包容。
