青年新政游蕙禎成功掃低黃毓民之後，多日嚟都成為傳媒寵兒，不過游BB對議事規則就真係BB級數啦！佢今日出席電台節目時，話上任之後，假如遇到修改議事規則或審議條例草案嘅時候，會盡量留喺議事廳，因為喺議事廳先可以有能力影響投票結果，又唔排除視乎票數決定拖延表決行動。
網絡意見領袖仇思達就立即係facebook發帖，揶揄游BB見識少，「如果建制派提出修改議事規則，係需要分組點票嘅。夾實『泛民』嗰十幾票就得，拉乜嘢布……？」所以話，游BB嘅答案永遠都會帶俾香港市民歡樂。建制派係地區直選無法過半數，就算提出議員議案修改議事規則，通過嘅機會可謂相當渺茫。佢居然話要「拉布」，「泛民」應該掩住半邊嘴笑啦！另外，坐係議事廳開會係天經地義，係議員應有嘅責任，所以千祈唔好話咩「盡量」坐喺議事廳。
游BB真係好可愛，之前係政綱就寫喺香港開採天然氣，結果係選舉論壇被黃碧雲問到口啞啞，而家就話遇到修改議事規則會拖延表決。佢嘅黨友梁頌恆都係咁可愛，明明規定立法會主席要40歲，佢就推舉不足40歲嘅朱凱迪或鄺俊宇去做。青政講嘢咁風趣幽默，唔怪得咁多人投票支持佢哋啦！
