「衣櫃」大小的棺材房可以住兩個人

　　十月五日係世界居所日，鄭晴見到一個「衣櫃」喺銅鑼灣展出，仲聽到有細路仔路過時問佢媽媽：「呢個係咪衣櫃嚟嘎？」媽媽竟然答佢：「唔係嘎，人哋住係入邊。」鄭晴又仔細睇睇，原來展出嘅「衣櫃」係一個真實住人嘅棺材房。香港社區組織協會幹事Angela話，依家喺深水埗、油麻地、北角甚至灣仔，仲有好多咁嘅棺材房。喺800至1000呎嘅空間內，可以擺放35至45個床位，平均每個人凈係有20呎度嘅空間，平均8個人共用一個廁所，租金仲要2000幾蚊！

　　72歲嘅嚴生依家就住喺油麻地嘅一個棺材房入邊，佢話，佢每月全部收入共5300蚊，棺材房嘅租金就需要2600蚊，佢已經喺度住咗17個月，其實佢都有申請公屋，但係等咗兩年，都完全冇音訊。「一日24小時，我有17小時出街，去圖書館、公園坐，睡覺再返去。」嚴生話，自己年紀大，腿腳不方便，棺材房空間細，其實上落床對佢都係好難件事。嚴生又同鄭晴話，租房剩低嘅錢都不夠食飯，肚餓時就搵社區提供嘅免費麵包和奶茶。

　　Angela話，藉世界居所日，佢哋想透過活動向公眾訴說喺繁華都會背後貧困嘅一面，希望政府增建公屋，設立中短期房屋策略，以過渡性房屋安置劏房居民。佢哋仲會於今日至9日喺香港文化中心展出由攝影師Benny Lam影嘅「侷住」房屋攝影展，展現劏房居民嘅艱辛生活。