圖：兩位反對派議員都好唔熟書，鄭松泰（左）同鄺俊宇（右）對議事規則嘅認識係錯到離曬譜
反對派嘅立法會新丁質素如何，相信大家一定笑而不語。尋日有電視台播出節目，訪問一班議會新丁，包括工聯會陸頌雄、新民黨容海恩、民主黨鄺俊宇同埋熱血公民鄭松泰。
訪問開始前，主持人都忍唔住要串下鄭松泰，提佢要教下助理點填學歷。反對派嘅表現真係好搞笑㗎，例如問鄭松泰知唔知幾點可以食晏，佢就話大約12點半至1點左右，但其實係無定時㗎。不過呢個都係其次，最精彩都係第二部分。
主持人將四位新丁分咗建制同反對派兩組，要佢哋答下審議法案嘅程序。建制就答啱曬，反觀鄭松泰同鄺俊宇就錯到離曬譜。佢兩個仲要有分歧添，鄭松泰話，記得首先法案交由法案委員會在內會研究，之後喺大會首讀、二讀，鄺神就話，二讀之後應該有充裕時間畀議員討論，所以二讀表決後交畀內會。不過呢，真正答案就係法案首讀後，就會予以二讀，然後交畀內會同法案委員會研究，研究完先交畀大會恢復二讀。鄭松泰仲話自己教書，又做網台節目，居然連最基本嘅審議法案程序都唔識。鄺俊宇都係，有五十萬市民授權，原來都係唔熟書，佢哋有無做好本分？
