圖：曾鈺成（右）「開咪」做DJ，第一集率先請咗細佬曾德成做嘉賓

　　曾鈺成唔做立法會主席之後仍然多多搞作，最近仲轉行去「開咪」做DJ，日後逢星期一至五都透過大氣電波曝光，新節目名就叫《鈺成千里目》，出街嘅第一集率先請咗細佬、前民政事務局局長曾德成做嘉賓，實行兄弟檔上陣，曾德成仲大談退休後喺北京生活嘅日子添！

　　曾主席首集嘉賓就打「親情牌」請曾德成出山，佢介紹細佬出場就話自己退休不甘寂寞出嚟做節目，點知細佬仲早過佢退休！咁耐無見嘅曾德成又忙啲咩呢？細佬話自己退休之後去咗北京小住，由二月底住到七月初先返香港，早排全國「兩會」期間兩兄弟先有機會見嚇面。

　　細佬北京小住接觸民情

　　咁有冇喺北京同中央人員接觸先？曾德成就話，有同各界人士接觸，即使唔係特別高層人士，亦可以令佢轉換角度思考問題。佢仲話，今次去北京唔係來去匆匆，真正接觸當地民情，換個角度睇更能體會國家點樣考慮，「以國家角度考慮，每一位領導人都唔會喺國家主權同領土完整上妥協」，由國家層面睇，香港只係一個小地方，應更多思考香港喺國家發展上角色。鄭晴真係覺得語重心長呢！

　　講起北京，兩兄弟仲趁機「話當年」，大談1971年第一次坐飛機同家人去北京嘅經歷。曾主席話，以前北京已經係好文明好客，「你去到北京或者內地其他城市，喺公共交通工具上面佢哋會讓座，見到我哋呢啲外來人仲會特別好客。」曾德成仲重提當年同阿哥去買西瓜，話喺王府井大街遇到個賣西瓜嘅小販，兩兄弟揀咗個西瓜準備埋單嘅時候，個小販竟然直接話：「（這）不是好瓜！」佢大讚北京好有人情味。