「青年新政」嘅「軍師」林浩基日前喺facebook轉發一段發生喺中東國家巴林首都麥納瑪、有民眾向警察總部擲燃燒彈嘅短片。佢留言回應網民嗰陣，又提到燃燒警局的行動細節，例如「香港既（嘅）建築無咁易燒，但若然衝入報案中心先燒值班警察，再向四周投擲，完成後迅速離場，應該四五個人就可以。」不過，他在最後聲稱：「我講緊電影劇本啦」。據了解，有警察亦好不滿，喺內部群組轉發有關報道，指每個人都應該發聲譴責，亦希望警方盡快果斷咁拘捕佢，認為此風不可長，絕對唔可以畀咁樣嘅言論同風氣蔓延落去。
嘩，「青政」有呢啲所謂「軍師」，唔怪得咁嘅質素啦！講嘢又不負責任，亂噏當秘笈，希望警方真係要嚴正執法。另外，黃毓民同「青政」咁大仇口，由佢創辦嘅網台MyRadio，尋日亦決定即時停止轉播林浩基有份主持嘅網台節目「米港時事」。林浩基則聲稱，「連半句都無鬧過『熱普城』，想起當日毓民封咪，真係歷史在笑。」惡人自有惡人磨，小二，嚟多兩斤花生，唔該！
