圖：董生（右）喺何喜華（左）陪同之下，一齊睇攝影展\大公報記者何嘉駿攝

        文 | 鄭晴

　　香港呢個彈丸之地，唔知你有無曾經諗過，有人一家四口住喺五十呎嘅天台屋，有小朋友日日屈喺樓梯做功課同食飯，仲有人幾乎全盲都要日日爬幾層樓，連洗衫去廁所、沖涼同煮飯都係同一個地方？

　　係咁嘅，香港社區組織協會搞咗個《「侷住」房屋攝影展》就喺尋日開幕，即日起至星期日去尖沙咀文化中心就有得免費睇！佢哋希望透過相片揭示香港社會劏房嘅問題，連全國政協副主席董建華都有去啊！董生仲同其中兩個劏房租戶傾偈，聽下佢哋對房屋嘅訴求。

　　其實香港住屋問題嚴峻都唔係第一日嘅事，社區組織協會何喜華話，呢個展覽已經籌備咗四年，邀請董伯伯嚟開幕原因，喺因為廿年前嘅一幅「相」。佢話，當時邀請咗仲未做特首嘅董建華去探訪劏房戶，張相就係嗰時影嘅，董生上任後亦成立咗長遠房屋策略督導委員會，所以今次請佢嚟別具意義咁話。

　　何喜華話，「其實貧窮不是數字，而係活生生的生命」，呢個展絕對唔係想唱衰香港，但事實係不少香港人都仍然住喺棺材房。佢希望將呢個信息帶畀社會，凝聚多啲共識，佢又希望新一屆立法會議員體恤下民情，等政府可以處理住屋問題。

　　鄭晴見到董生皺着眉頭咁行曬成個攝影展，周不時同相入面其中兩個「主角」傾偈。何喜華形容董生好感慨，話香港不可以再係咁，要諗多啲方法解決住屋問題。