圖：曾俊華（左）同梁錦松（右）到惜食堂廚房幫手整飯盒

　　由前財政司司長梁錦松擔任主席嘅「惜食堂」尋日舉行感謝宴，邀請捐贈夥伴一嘗用剩餘食物製成嘅飯餐。阿松就搵嚟財政司司長曾俊華做主禮嘉賓。在感謝宴開始前，阿松帶財爺參觀「惜食堂」嘅中央廚房，兩人又戴上衛生帽，同義工團隊一齊玩煮飯仔。煮乜餸呢？有三款，款款嘅名都好精緻：惜食素菇扒瓜甫、惜香蒜片金菇雞、愛心白雪藏龍捲。兩人身體力行呼籲市民珍惜食物，唔好做「大嘥鬼」。

　　阿松話，惜食堂喺過去五年，已經回收咗超過240萬公斤剩餘食物，仲生產咗近300萬個飯盒同埋食物包，有成二萬人受惠，目前惜食堂每日製造6500個熱飯盒和1000個食物包，七成係畀長者，希望可以幫到啲唔方便煮食嘅老人家。

　　財爺就話，香港目前每日浪費3600公噸食物，相當於250架雙層巴士嘅重量，惜食堂將食物回收再生產協助基層市民溫飽，又可以幫到長者喺社區中心吃飯時聚首一堂，擴大社區網絡，更好享受退休生活，期待更多機構加入捐贈行列。

　　受惠者觀蓮婆婆以前吃一個麵包就當一餐飯，因為去街市好怕被撞倒而受傷，如果買咗嘢又無力氣抬回家，依家「惜食堂」日日都有熱飯提供，喺社區中心有飯吃，覺得非常開心呢。