行路原來都好有學問！鄭晴聽聞運輸及房屋局鼓勵市民多啲行路，欣賞一下城市特色，特別開咗個名為「路人甲Any Walker」嘅Facebook專頁，仲貼出幾張香港「特色天橋」相片，考考網友知唔知位置喺邊度！其實有行過鬧市都好易認得，相信難唔到神通廣大嘅網民啦。
專頁話，香港有超過七百條天橋，實用之餘，無論設計、用料、顏色同線條上都各具特色，成為城市中獨特風景，仲話「其實，人人也可以是路人甲。多一個角度看香港，分享觀察，從心出發」。咁有「文青」感覺，令人煥然一新，抵畀個Like你！
話說回來，運房局局長張炳良尋日出席一個步行推廣活動致辭話，政府擴大公共交通系統容量嘅同時，亦要令本港更適合步行，等香港成為可持續城市。佢話，社會呢幾年對所有基建發展都有反對情緒，但係各區都同時要求增建道路同鐵路。
