文｜鄭晴
今屆立法會座位表終於出爐，結果同上屆無太大分別，建制派都係坐喺立法會主席右手邊，前排屬於經民聯，中間則係民建聯，最後排就係工聯會。呢邊係貼近政府官員。議事廳左邊則繼續由「泛民」佔據，公民黨「死守」前排，民主黨則喺後排攻擊，而後排最左嘅一角，即係以前胡志偉個位，就係「鮮明出眾」嘅鄺神……
原先「青年新政」梁頌恆、游蕙禎希望坐喺中間最前排，方便衝出去主席枱，但中間最前兩排則繼續係自由黨議員，第三排就有新民黨同自由黨。建制派、「泛民」一早就原區安置。
既然「青年新政」咁鍾意「自決」，最終只能坐中間最後排，梁頌恆隔離仲要係同「青政」好大仇口嘅熱血公民鄭松泰，真係精彩囉！如果「青政」同「熱狗」要發難，相信都幾難。過曬氣嘅「拉布兩丑」梁國雄同陳志全，今屆坐得前咗，中間第四排最左邊嗰兩個，第五排仲有朱凱迪、劉小麗、羅冠聰等人。
鄭晴見到咁嘅陣容，真係不禁聯想起，壞學生坐後排的讀書時代。唉，希望佢哋真係諗下可以點為市民服務。唔會再癱瘓議會就好！
