「青年新政」游蕙禎尋日又喺立法會主席競選論壇「發功」，死撐議員用粗鄙字眼無問題，仲要經民聯梁君彥解釋《議事規則》有咩禁言禁語，最後梁君彥就一句KO游議員，話講到明《議事規則》規定議員發言不可有攻擊同侮辱性字眼；佢又話立法會會議其實喺好多電視台都有直播，如果議員嘅粗鄙言語直播出街，或會惹來通訊局投訴同罰錢囉，希望「尊貴」議員注意嚇。
另外，論壇完結後，青年新政召開記招，大家當然繼續追問佢日前嘅「高見」啦！豪放禎就話，語言運用最主要嘅原則係「達意」，如果講嘢無人明，呢個先係問題。佢又話，議會上以前提出一啲議題，市民都係未必有好深嘅認知，或者未必有興趣，呢個都係想反思嘅問題。如果覺得嗰個字必須用，就一定唔會避喎。嘩，聽落好似真係用心良苦囉，不過佢咁講完，鄭晴都係諗唔到「X嘢」同住屋有咩關係啦！
