圖：Holden話食香蕉有好多益處，叫某啲議員唔好浪費食物亂咁掟/設計圖片
民建聯立法會議員周浩鼎（Holden）早前參與新丁迎新活動，喺立法會議事廳食香蕉，唔覺意畀傳媒捕捉到。Holden尋日同傳媒聚會時，再次為件事解畫，嗰日立法會前主席曾鈺成嘅分享會喺九點半開始，佢九點已經到達，見成個議事廳得佢一個，於是諗住快快手食條蕉充飢，絕對就唔係外界所講的上堂食蕉。Holden話，事後已經問過秘書處，會議室雖然無絕對規定話「禁食」，不過自己下次都會注意嚇！
不過注意還注意，Holden就話自己點都唔會放棄「喫蕉」喎！事關呢個習慣係佢英國讀書時已經養成，仲笑笑口講每朝起身都一定要食一條蕉，唔食唔心息。佢又暗串某啲反對派議員，成日喺議事廳「掟蕉」抗議，而食香蕉有好多益處，叫議員唔好浪費食物！鄭晴就好認同Holden講法，覺得「掟蕉」浪費食物，各位反對派，不如索性一齊「喫蕉」好過啦。
