圖：阿Bill尋日去咗報名參選勞顧會委員
工聯會前勞工界立法會議員鄧家彪（Bill）雖然失落今屆新東議席，但已經收拾心情，繼續專心勞工事務，最新動向就係參選勞顧會委員。
兩年一任嘅勞顧會今年底換屆，話說Bill尋日就去咗勞工處報名，打算接替做咗六年委員、決定退下火線嘅工聯會理事長吳秋北。阿Bill同鄭晴講，「秋北做咗六年，成功團結到勞方代表」，對自己接替秋北感到一定壓力。佢又話，呢幾年資方立場愈嚟愈強硬，都要諗下仲有咩方法解決，相信會好艱難。
至於如果當選後有何大計，Bill就話，雖然對標準工時委員會個報告唔多樂觀，但就會積極跟進；佢又希望喺取消強積金對沖方面可以做到嘢，睇嚇勞顧會可唔可以有一個談判角色；另外仲有「打工仔」最期待嘅畫面，就係勞工假期同公眾假期睇齊，劃一為17日。除咗勞顧會，佢話嚟緊工作仲要幫嚇兩位新晉勞工界立法會議員陸頌雄、何啟明，希望議會內外都鞏固到工聯會嘅工作，相信繼續有排忙啦。
