圖：反對派「整色整水」，監誓嘅立法會秘書長陳維安依然秉公處理監誓程序

　　反對派議員喺立法會宣誓儀式上演咗場大龍鳳，出盡法寶咁喺誓詞前中後加鹽加醋。之但係雖然反對派「整色整水」，監誓嘅立法會秘書長陳維安依然秉公處理監誓程序。不過，反對派仲死口話喺誓詞入面加辱華字眼同粗口無問題，因為係口音，反屈陳維安無權宣布宣誓無效！鄭晴就想講句「唔該」反對派返去搞清楚先啦，秘書長只係話自己「無權監誓」，無講過宣布宣誓「無效」噃，就連前立法會主席曾鈺成都讚秘書長做法恰當，絕對無所謂越權。

　　曾鈺成同陳維安共事多年，陳係點嘅人最清楚不過啦。佢尋日出席活動時就引梁國雄之前案例話，按法院裁決如果議員無按規例宣誓，秘書長可以話無權為嗰位議員監誓，「你睇陳維安的確係咁做喎，只係宣布無權監誓，而唔係『裁定』宣誓無效」，唔覺得陳維安處理手法有問題。曾鈺成又話，宣誓係咪有效應該等主席產生之後裁定，不過如果「尊貴」議員拒絕完成程序，就會喪失議員資格，需要再依法例進行補選。

　　鄭晴前日就喺現場，見到陳維安對住啲玩嘢嘅議員依然面不改色，用專業嘅態度對住啲不專業蠻行，仲好體貼咁阻止讀足12分鐘誓詞嘅劉小麗喺誓詞後面「加料」，等佢勉強過到骨做到「尊貴」嘅議員。其實，秘書長陳維安監誓前已經做足功課，開會前向議員發信，講到明如果不按法律規定宣誓，佢無權為佢哋監誓，議員亦無得參與會議或表決，唔知係咪反對派隻耳仔同對眼都有問題，當秘書長講嘢透明啫！

　　鄭晴