圖：興哥好希望過百件道具可以保存喺歷史博物館/資料圖片
喺立法會選舉以23萬多票高票惜敗嘅工聯會王國興，不但冇因為競逐連任失敗而感到意興闌珊，反而搵埋同樣落選嘅工聯會成員鄧家彪成立「23萬監察」，繼續監察政府施政同埋立法會議員嘅表現。興哥緣盡立法會，陪佢亮相多年嘅各式各樣道具亦已完成歷史任務，佢就好希望啲道具可以保存喺歷史博物館。興哥仲話，自己聯絡緊康文署，申請將香港嘅議會文化列為本港非物質文化遺產。
興哥喺12年嘅立法會議員生涯入面製作過唔少道具，包括要求剪布嘅「金鉸剪」、爭取取消強積金對沖嘅豬仔錢罌，仲有控訴龕位難求嘅紙紮骨灰龕等，每一件道具背後都係一個議會故事。興哥話，自己至少都整咗過百件道具，全部都見證過立法會辯論同香港嘅歷史變化，希望歷史博物館可以收容佢哋，「如果送曬佢哋去堆填區就好可惜喇。」
興哥仲話，自己喺上個月中已經去信康文署非物質文化遺產諮詢委員會，申請將香港嘅議會文化列為本港非物質文化遺產，康文署暫時都仲考慮緊。佢又同鄭晴講，話自己希望申請「非遺」一事能夠盡快有結果，至於有冇信心能夠申請成功，佢就希望傳媒可以發嚇聲，或者機會會大啲。
