圖：大家快啲Follow我Instagram啦，睇下我平時嘅港女生活係幾威/設計對白

　　青年新政游蕙禎近日頻頻曝光，真係鑊鑊新鮮鑊鑊甘，鄭晴見到佢嘅言行都覺得好失禮！身為候任立法會議員，一啲都唔注意自己言行舉止，有失斯文，教壞細路，佢Facebook就成日發表謬論。唔知係咪因為Facebook太「正經」，所以Cheap禎早前專登開咗Instagram戶口，仲叫大家關注一下喎！

　　鄭晴一睇，真係耳目一新，啲相全部都係Cheap禎私人生活，其中一張更加係文華東方酒店嘅餅店打卡，鄭晴估唔到Cheap禎都咁虛榮、咁港女囉。而且鄭晴一諗起自己都有份交稅，養呢啲食嘢唔做嘢，一係只係識玩嘢、侮辱香港人嘅「尊貴」議員，就真係好心痛囉！

　　呢排仲要成日有人同鄭晴講，Cheap禎係你哋前同事，鄭晴聽完真係滴曬汗。之唔係就係話Cheap禎大學二年級嘅時候喺《大公報》做過兩個星期實習囉。話說而家維基百科都仲寫住佢當年係不滿被改稿所以辭職，佢仲自爆曾經被彈稿七次。鄭晴嘅編輯同事好盡責咁搵過曬Cheap禎當年寫嘅稿出來睇，話文筆真係唔似中文系學生囉，唔好好咁修改真係好難符合我哋見報嘅標準。鄭晴仲發現Cheap禎前幾日喺接受傳媒訪問時自爆係「腐女」，愛好係網上創作BL（Boy's love，男男愛情）小說。難怪Cheap禎唔啱做報紙啦，新聞唔同寫小說嘛，佢仲有啲咁特別嘅愛好，寫出來我哋都見唔到報啦。

　　鄭晴