青年新政兩隻「小學雞」梁頌恆、游蕙禎，因為早前宣誓時爆粗同侮辱國家，而家搞到連議員資格都危危乎。同「青政」有好大牙齒印嘅「教主」黃毓民，尋日就喺facebook直播，恥笑梁游兩人「玩大咗」係「抵死」，又話佢哋考慮按照誓詞宣誓，最終都要跪低，用「抗爭有底線、妥協無原則」去形容佢哋係最適合不過，究竟梁、游兩人係咪咎由自取呢？就由大家去評論喔。「教主」食花生食得咁開心，「國師」陳雲都唔執輸，都喺facebook揶揄梁、游兩人係偽「港獨」青年，不識好歹，為咗議席薪金同議員辦公室養起嘅朋黨，捲入這種政治風波，令香港人陪葬，香港青年選呢啲港仔做代表，「也是活該」。鄭晴見到「港獨」派內部鬼打鬼，都不禁唏噓：「本是同根生，相煎何太急」。
