青年新政梁頌恆、游蕙禎喺香港已經係「過街老鼠，人人喊打」，佢哋早幾日就高調去咗台灣搵「台獨」分子「抱團取暖」。游蕙禎前日喺宣揚「自決」嘅座談會上見傳媒時仲斬釘截鐵話，佢哋無打算見台灣任何政黨，結果尋日台灣就有傳媒報道話，佢哋前晚缺席基進黨座談。鄭晴同大家一樣，唔係咁了解台灣政黨情況，就問咗下Google大神，基進黨係唔係激進黨嚟？原來又真係噃，呢個基進黨被指係「台灣第一個及最主要高舉『台獨』左派標幟的參政團體」。

　　台灣中央社尋日報道話，梁游和本土民主前線黃台仰原定前晚8時30分到基進黨台北事務所參加座談，結果最後只有黃台仰現身。基進黨尋日發表聲明話，梁頌恆、游蕙禎雖已答應與會，卻與前一個活動的邀請方「在安排和溝通上似乎出了一些問題」，才臨時不克出席。梁頌恆、黃台仰仲錄製咗解釋影片畀基進黨。

　　無朋友肯借電話借錢？

　　梁頌恆話，台大活動結束後同兩名接待一齊食晚餐，夜晚八點幾去咗「另外一個地方」，原本要應約去基進黨台北事務所，但「那邊有一些朋友一直在」，所以「很尷尬」。佢又話，等到要赴約嘅時候，先發現「沒有Wi-Fi、（電話）沒有電、沒有錢」，搵唔到座談會舉辦嘅地方，為咗呢件事覺得相當唔好意思。梁頌恆嘅「鴨脷洲口音」之外又有新搞作，無Wi-Fi，電話無電，無曬錢，你唔係被人綁架啩？你唔係話「那邊有一些朋友一直在」嗎？全部都係唔肯借電話同錢畀你嘅「朋友」？定係嗰啲神秘「朋友」幫你保管手機，驚爆出「竊聽風雲」呢？

　　黃台仰就幫口話，梁頌恆唔係咁了解台灣，誤會咗兩個接待帶佢去嘅地方就係基進黨台北事務所，所以拖咗一段時間。梁後來先發現身上無現金，要返酒店攞錢，但嗰時已經夜咗。係，大家無睇錯，梁同黃嘅講法好唔同，真係失蹤羅生門，唔該你哋講大話都夾下口供先啦！

　　同樣缺席座談嘅游蕙禎就無喺短片現身，唔知佢有乜更加神秘嘅行程呢？